Hei tō taenga atu ki te wāhi pōti, ka mihi atu ngā kaimahi ki a koe, ā, ka whakautu rātau i ō pātai. He kākahu karaka ō rātau.
Ka kitea hoki he tohu e ārahi ana i a koe ki ngā wāhi tika.
Ko ngā tūāhuatanga o te wāhi pōti
Te tiki atu i tō puka pōti
Ka tohua ana koe e te tangata tuku pepa pōti, kia tatū atu ki aia. Tukua tō kāri Pōti Tere ki te tēpu, me te whakapuaki i tō ingoa. Ka kimi ia i tō ingoa i te rārangi pōti, ā, ka tuku atu i tō puka pōti ki a koe.
Mehemea kāhore i a koe tō kāri Pōti Tere, ka pātaia tō ingoa me tō wāhi noho, ā, ka paku roa ake tana kimi i a koe i te rārangi pōti.
Ina whiwhi koe i tō puka pōti, kawea atu tō puka ki te ārai pōti, kia matatapu ai tō pōti.
Ka āhei koe ki te rēhita i te wāhi pōti tonu
Me rēhita koe e mana ai tō pōti. Mehemea kāhore anō koe kia rēhita i tō taeanga atu ki te wāhi pōti, ka āhei koe ki te rēhita i reira. Ka āhei koe ki te rēhita, ki te pōti hoki i tētehi o ngā wāhi pōti puta noa i Aotearoa, tatū atu ki te rā pōti. Me whakakī koe i tētehi puka rēhita me tētehi puka 'special declaration vote'. Ka ārahi ngā kaimahi o te wāhi pōti i a koe, ā, ka whakautu i ō pātai.
Me tuku peangē koe i tētehi pōti motuhake
Mehemea kāhore tō ingoa i te rārangi pōti ā-pepa o te wāhi pōti, me whakakī koe i tētehi puka 'special declaration vote' i mua i tō pōti. E kīia ana tēnei he 'pōti motuhake'.
Kāhore peangē e kitea tō ingoa i te rārangi pōti ā-pepa mehemea:
- I rēhita koe i muri mai i te tānga o te rārangi
- E pōti ana koe i tētehi rohe pōti i tua i te rohe e noho nā koe
- Kei te rārangi muna koe
Mehemea ko te hiahia āwhina koe ki te pānui, ki te whakakī rānei i ō puka pōti
Ka āhei tētehi hoa, tētehi whanaunga, tētehi kaimahi rānei o te wāhi pōti ki te tautoko i a koe. Kāhore e āhei ia ki te ārahi i ō kōwhiringa pōti i te pōtitanga ā-motu, heoi, ka āhei ia ki te:
- Haere ki te ārai pōti hei hoa mōu
- Pānui ā-waha i ngā kupu me ngā pārongo o ngā puka pōti
- Whakakī i ō puka pōti, mehemea ka tono atu koe kia pērā
Ko te hiahia āwhina koe ki te pōti?
