2019 local elections Te rēhita mō ngā pōtitanga ā-rohe 2019

Ko ngā pōtitanga ā-rohe te wā e whakatau ai tātau ko wai ngā māngai mō tātau ki ō tātau kaunihera me ngā poari hauora. Ka taea e ngā tāngata katoa kei runga i te rārangi pōti te pōti i ngā pōtitanga ā-rohe. Ka whakahaerehia ngā pōtitanga hei pōti mēra ā te Whiringa-a-nuku o tēnei tau.

Ko ngā pōtitanga mō ngā kaunihera tāone nui, kaunihera ā-takiwā, ā-rohe me Ngā Poari Hauora ā-Rohe. I ētahi wāhi o Aotearoa, ka tū anō ngā pōtitanga mō ngā poari ā-rohe me ngā poari hapori, ngā tarahiti raihana me ētahi atu whakahaere.

Me rēhita koe kia āhei ai koe ki te pōti me te whakaputa i ō whakaaro i ngā pōtitanga ā-rohe.

Ka taea e koe te rēhita ki te pōti mēnā 18 neke atu rānei ō tau, he kirirarau, kainoho tūturu rānei nō Aotearoa, ā, neke atu i te kotahi tau mau tonu i te iti rawa tō noho ki Aotearoa i tētahi wā.

Hei whakarite ka tino nui rawa te hunga e rēhita ana ki te pōti i te wā tika, ka tukuna atu he mōkī whakahou rēhita i roto i te mēra ki ngā tāngata katoa kei runga i te rārangi pōti mai i te 29 o Pipiri. Ko tāu noa iho he tirotiro mēnā kei te tika ngā kōrero mōu. Mēnā kei te tika, kāore he mahi atu anō māu. Mēnā he mea hei whakahou, me whakatika ka whakahoki wawe mai ki a mātau.

Ki te kore e tae atu he mōkī ki a koe i mua o te Mane te 8 o Hōngongoi, ko te tikanga kāore koe i te rēhita ki te pōti, kāore rānei ō taipitopito i te hou rawa. Hei rēhita, hei whakahou rānei i ngā kōrero mōu, me whakakī e koe he puka rēhita hou. Haere ki vote.nz, waea atu rānei ki 0800 36 76 56 ka tono kia tukuna mai he puka rēhita ki a koe.

E whakahaerehia ana ngā pōtitanga e ngā kaunihera ā-rohe, ā, hei te pito o Mahuru ka tukuna e rātau ngā pepa pōti i roto i te mēra ki ngā kaipōti katoa kei runga i te rārangi pōti.

Ki te kore koe e rēhita i mua o te Paraire 16 o Hereturikōkā kāore koe e whiwhi i ō pepa pōti i roto i te mēra. Ki te rēhita koe i muri i tēnei rā, ka mate koe ki te tono i ngā pepa pōti motuhake mai i te āpiha whakahaere pōti o tō kaunihera ā-rohe.

Mō ētahi atu mōhiohio mō te rēhita ki te pōti, haere ki vote.nz

Mō ētahi atu mōhiohio mō te pōti i roto i ngā pōtitanga ā-rohe, haere ki vote2019.co.nz