2019 local elections Lesitala mo faigapalota o pulega faapitonuu mo le 2019

O faigapalota o pulega faapitonuu o taimi na e fai ai a tatou filifiliga poo ai e fai ma o tatou sui i totonu o a tatou pulega ma komiti faafoe o le soifua maloloina. Soo se tasi o loo iai le suafa i le lola palota e mafai ona palota i faigapalota o pulega faapitonuu. O le a faia faigapalota e ala i le lafo atu i pusameli o palota ia Oketopa o le tausaga nei.

O nei palota e saili ai ni faufautua mo le aai ma itumalo, o faufautua faaitulagi ma Komiti Faafoe o le Soifua Maloloina a Itumalo. I nisi vaega o Niu Sila, o le a faia ai foi faigapalota mo le sailia o komiti faafoe a pitonuu ma komiuniti, o faalapotopotoga o loo pasia laisene mo fale faatau ‘ava malosi (licensing trusts) ma isi lava faalapotopotoga.

E manaomia ona e lesitala ina ia mafai ai ona e palota ma faaleo sou manatu i faigapalota o pulega faapitonuu.

E mafai ona e lesitala e te palota pe afai ua 18 po ua sili atu tausaga o lou matua, o oe o se sitiseni poo se tagata ua nofomau i Niu Sila, ma na iai se taimi o lou olaga na sosoo ai lava lou nofo i Niu Sila mo le sili atu i le tausaga.

Ina ia faamautinoa ua toatele tagata ua mafai ona lesitala e palota i totonu o le taimi faatulagaina, e amata i le aso 29 o Iuni ona lafoina atu i pusameli ni pepa faatumu mo le toe faafouina o le lesitala mo le palota. Pau lau mea e fai o le siaki poo sa‘o pea ou faamaumauga o iai. Afai o sa‘o, e leai la se mea e te toe faia. Afai e iai se mea e toe fia faafou, ona fai lea o na suiga ma toe vave lafo mai.

Afai e oo atu i le Aso Gafua, aso 8 o Iulai, e lei oo atu au pepa, lona uiga e lei lesitalaina lou suafa mo le palota pe e lei toe faafouina ou faamaumauga. Ina ia lesitala pe toe faafou ou faamaumauga, o le a manaomia ona e faatumuina se pepa lesitala fou. Alu i luga o le initaneti i le vote.nz pe vili le 0800 36 76 56 e talosaga i ai e lafo atu sau pepa e faatumu.

O pulega faaitumalo ma pitonuu o loo faafoeina faigapalota, ma o le faaiuiuga o Setema o le a latou lafo atu ai i pusameli pepa palota i tagata palota uma o loo iai suafa i le lola palota.

Afai e oo atu i le Aso Faraile, 16 o Aokuso ae e te lei lesitala, e lē lafoina atu la i le meli au pepa palota. Afai e te lesitala mai ae ua tea lena aso, e te agai la i le ofisa faipalota a le pulega a lou pitonuu e talosaga i ai mo ni au pepa palota faapitoa.

Mo nisi faamatalaga i le lesitalaina o suafa mo le faigapalota, agai i le vote.nz

Mo nisi faamatalaga i le faatinoga o palota i faigapalota o pulega faapitonuu, agai i le vote2019.co.nz