Are you eligible to enrol and vote?

Mehemea 17 ō tau, ka āhei koe ki te whakakī i te puka rēhita ināianei. Hei tō huritau 18, ka rēhita aunoatia koe, me te aha, kua rite koe ki te pōti. He māmā.

Rēhita ināianei

E āhei ana koe ki te rēhita, ki te pōti hoki mehemea he kainoho pūmau koe, ā, kua noho koe ki Aotearoa mō te 12 marama karapipiti, mō tētehi wā roa ake rānei.

Mō ngā take pōti, he kainoho pūmau koe mehemea he mana ā-ture tōu ki te noho ki Aotearoa, ā, ehara i te mea kua kīia ā-ture me wehe koe i roto i tētehi wā tauwhāiti.

Ka korowai tonutia koe e tēnei tikanga mehemea he pane uruwhenua kainoho tāu, he kātū pane uruwhenua anō rānei, mehemea:

• e noho ana koe ki Aotearoa
• kāhore e kīia ana i tō pane uruwhenua me wehe koe i Aotearoa i roto i tētehi wā tauwhāiti
• kua noho koe ki Aotearoa mō te 12 marama karapipiti, mō tētehi wā roa ake rānei
• he mana ā-ture tōu ki te noho ki Aotearoa
• kāhore koe i raro i ngā wāhanga 15, 16 rānei o te Immigration Act, hei tauira, kua whiua koe mō ētehi kātū taihara, kua panaia atu koe i Aotearoa, kua panaia atu rānei i tētehi atu whenua.

Mehemea he Pane Uruwhenua Kainoho 2021 tāu, ā, kei te tika mōu ngā kōrero i runga tata nei e tutuki nei i a koe ngā paearu māraurau, e āhei ana koe ki te rēhita, ki te pōti hoki i Aotearoa.

Mehemea he pane uruwhenua mahi tāu e kī ana me wehe koe i Aotearoa i mua i tētehi wā tauwhāiti, he pane uruwhenua ako rānei e kī pērā ana, kāhore koe i te āhei ki te rēhita, ki te pōti rānei.

Rēhita ināianei

Ka āhei koe ki te rēhita, ki te pōti hoki ā muri i tō noho ki Aotearoa mō te 12 marama karapipiti, mō tētehi wā roa ake rānei.

Ka āhei koe ki te rēhita, ki te pōti hoki mai i tāwāhi mehemea e tika ana ēnei tauākī katoa:

• kua 18 tau tō pāhake, kua pāhake ake rānei koe
• kua noho koe ki Aotearoa mō tētehi wā roa ake i te 12 marama karapipiti, i roto i ngā tau
• kei te hāngai tētehi o ēnei tauākī ki a koe:
  • he kirirarau koe nō Aotearoa kua toro mai ki Aotearoa i roto i ngā tau e 3 kua pahure ake
  • he kainoho pūmau koe nō Aotearoa kua toro mai ki Aotearoa i roto i ngā marama e 12 kua pahure ake.

Ko tō rohe pōti te wāhi noho whakamutunga i Aotearoa i nōhia rā e koe mō te 1 marama, mō tētehi wā roa ake rānei i tērā.

Ehara i te mea ka herea koe e te ture ki te rēhita mai i tāwāhi — kei a koe te tikanga.

Rēhita mai i tāwāhi

Mehemea kei roto koe i tētehi o ēnei rōpū e whai ake nei, e āhei ana koe ki te rēhita, ki te pōti hoki, ahakoa te roa o tō noho ki tua i Aotearoa:

• ko ngā kaimahi kāwanatanga e mahi ana i tāwāhi, ko ngā whānau rānei o aua tāngata 
• ko ngā takawaenga kāwanatanga me ngā māngai tauhokohoko o Aotearoa, ko ngā whānau rānei o aua tāngata
• ko ngā mema o Te Ope Kātua o Aotearoa, ko ngā whānau rānei o aua tāngata.

Rēhita ināianei

Mehemea kei te mauheretia ā-tatari koe, kei te mauheretia ā-kāinga koe, kei te whakatutuki koe i tētehi whiunga ā-hapori, kei roto rānei koe i te whare herehere mō tētehi wā poto iho i te 3 tau, ā, kei te tika mōu ngā kōrero kei te tīmatanga o tēnei whārangi e tutuki ai i a koe ngā paearu māraurau, ka āhei koe ki te pōti.

Rēhita ināianei

Mehemea kāhore ō wharenoho, ka āhei koe ki te rēhita i te wāhi kei reira koe i ētehi wā nui. Ka āhei hoki koe ki te rēhita ki te wāhi noho whakamutunga i nōhia rā e koe mō te 1 marama, mō tētehi wā roa ake rānei, ahakoa kua aua atu pea te wā mai i taua noho rā.

Ina rēhita koe ki te pōti, me tuku e koe tētehi wāhi pōhi e taea ai te tuku mēra pōti, hei tauira, ngā whakaūnga o tō rēhitatanga. Tērā pea ko taua wāhi pōhi ko tētehi Pouaka Poutāpeta, ko te wāhi noho o tētehi hoa, o tētehi whanaunga, o tētehi whare karakia, o tētehi rōpū tautoko, heoi anō, me whakaae tētehi tangata o reira ki te tiaki i ngā mēra hei tiki atu māu.

Rēhita ināianei

Kāhore koe e āhei ana ki te pōti, ki te rēhita hoki mehemea e tika ana tētehi o ēnei tauākī e whai ake:

• he kirirarau koe nō Aotearoa, ā, kāhore i toro mai ki Aotearoa i ngā tau e 3 kua pahure ake
• he kainoho pūmau koe nō Aotearoa, ā, kāhore koe i toro mai ki Aotearoa i ngā marama e 12 kua pahure ake
• kua kīia ā-ture me wehe koe i Aotearoa i mua i tētehi wā tauwhāiti, hei tauira, i runga i ngā tikanga o tētehi puka whakaaetanga ā-ākonga, ā-mahi, ā-manuhiri rānei
• kei te mauheretia koe mō te 3 tau, roa atu rānei i tētehi whare herehere i Aotearoa
• kei roto koe i tētehi hōhipera mate hinengaro, ā, kua noho ki reira mō te wā roa ake i te toru tau i muri i te whakapaetia ōu ki tētehi taihara takahi ture
• kua whiua koe mō tētehi mahi kaiā, ā, kua tāpirihia tō ingoa ki te Corrupt Practices List

Mehemea kāhore koe i te tino mōhio ki te āhua o tō āheitanga, waea mai ki 0800 36 76 56.

Whakapā mai ki tō mātou rōpū rēhita

Tirohia te ture mō te āheitanga ki te rēhita