E āhei ana tō uru ki te rārangi matatapu?
Kāore te katoa e rongo i te haumaru ina tāngia tūmatawhānuitia ai ō rātou taipitopito ki te rārangi pōti, engari ehara i te mea ka riro tō rātou mana ki te pōti.
Mēnā e māharahara ana koe ki tō haumarutanga, ki te haumarutanga rānei o tō whānau, e āhei ana tō tono kia whai wāhi atu ki te rārangi matatapu.
Ka tiakina ō taipitopito rēhita, ā, kāore e tukuna ki tangata kē.
Ki te noho koe ki te rārangi matatapu, kāore ō taipitopito e kitea i ngā tānga rārangi kaipōti.
Kāore hoki e āhei tō tirotiro, tō whakahou rānei i ō taipitopito rēhita mā runga ipurangi.
Ka pōti koe mā te pōti motuhake ki ngā pōtitanga whānui, ā-rohe hoki.
Kāore e whai pānga ki te rohe pōti e noho nei koe, ki tō whiringa rārangi kaipōti rānei, ahakoa rārangi whānui, ahakoa rārangi Māori rānei.
Me pēwhea te uru ki te rārangi matatapu
Kia tono kia uru ki te rārangi matatapu, kōwhiringia tētahi o ngā whiringa e whai ake nei:
- tīkina ake te puka kei te take tonu o tēnei whārangi, whakakīia, ka īmēra mai ai ki a mātou
- waea mai ki 0800 36 76 56, ā, mā mātou e tuku atu te puka ki a koe mā te poutāpeta.
Mēnā kāore anō koe kia rēhitatia, me whakaoti hoki e koe tētahi puka rēhita.
E whai puka rēhita ai koe, kōwhiringia tētahi o ēnei ara e rua:
- waea mai ki 0800 36 76 56, ā, mā mātou e tuku tētahi puka rēhita ki a koe mā te poutāpeta.
- tīkina ake tētahi puka rēhita hei whakakī māu, ka whakahoki mai ai ki a mātou
Tīkina ake tētahi puka rēhita (PDF, 79KB)
Te whakahoki mai i te puka
Tēnā, matawaitia, whakaahuatia rānei tō puka kua oti kē te whakakī, me ngā mōhiohio taunaki hoki, ka īmērahia mai ai.
Īmēra: unpublished.roll@elections.govt.nz
E āhei hoki ana tō whakahoki mai i tō puka kua oti kē te whakakī, tae atu ki ngā taunakitanga, ki
Electoral Commission
FREEPOST 2 ENROL
PO Box 190
Wellington 6140
He aha ngā momo taunakitanga me whakauru e au?
Me tuku mai ngā mōhiohio e whakaatu mai ana i ngā take e hiahia ana koe ki te rēhita ki te rārangi matatapu.
Anei ko ētahi tauira o ngā momo mōhiohio me whakauru e koe.
(Ehara i te mea me whai wāhi mai ēnei momo mōhiohio katoa e āhei ai tō tono).
He reta e whakamārama ana i te take e mōrearea ai tō noho nā runga i tō mahi, i ngā āhuatanga whaiaro rānei.
Mā tō kaituku mahi rānei, mā tō rōia rānei, mā tō tauwhiro rānei, mā tō kaitaunaki rānei, mā tētahi tangata whai mana rānei i te hapori tēnei reta e tuhi.
He kape o tētahi whakahau whakamarutanga e mana ana i raro i te Family Violence Act 2018.
He kape o tētahi whakahau aukati e mana ana i raro i te Harassment Act 1997.
He pārongo nā tētahi pirihimana, nā tētahi āpiha herehere rānei e whakamārama ana i ngā take ka raru pea tō haumarutanga, te haumarutanga rānei o tō whānau ina tāngia tō ingoa me tō wāhitau.
Ka pēhea ina panoni aku taipitopito whaiaro?
Ka whai wāhi atu ana koe ki te rārangi matatapu, me whakamōhio mai koe ki te panoni ētahi o ngā taipitopito rēhita mōu, pērā i tō ingoa, i tō wāhitau rānei.
Ka āhei hoki tō tono ki te hoki ki te rārangi pōti tūmatawhānui ki te panoni ō āhuatanga whaiaro.
Me whakamōhio mai ngā panonitanga ki ō taipitopito i mua i te weherua pō, 13 ngā rā i mua i te rā pōtitanga.
īmērā mai ki unpublished.roll@elections.govt.nz
Mā hea au pōti ai mēnā kei te rārangi matatapu au?
Ka pōti koe mā te pōti motuhake ki ngā pōtitanga pāremata, ki ngā pōtitanga ā-rohe anō hoki.
Pōtitanga Pāremata
E āhei ana tō pōti i tētahi wāhi pōti, ahakoa ko tēhea, i te pōtitanga whānui, i te pōtitake, i te pōtitanga whakakapi rānei.
Ka mate koe ki te tuku i tētahi pōtitanga motuhake nā te mea kāore e kitea ō taipitopito ki te tānga rārangi kaipōti ka whakamahia hei tuku atu i ngā puka pōti i te wāhi pōti.
E taea ai tō pōti motuhake ki te pōtitanga whānui, me whakakī hoki tētahi puka atu anō hei whakaū i te rohe ki reira rā koe rēhitangia ai hei kaipōti.
Ehara i te mea me whakakī koe i te wāhitau, i tō ingoa o mua rānei i te puka ki te kore e hiahia. Heoi anō, mā te tuku i ēnei mōhiohio, ka āwhinatia mātou kia whakaū i tō āhei ki te pōti.
Ka tae ana koe ki tētahi wāhi pōti, he tangata kei reira hei whakaatu atu i ngā mahi ki a koe.
Pōtitanga ā-rohe
E taea ai tō pōti motuhake ki ngā pōtitanga ā-rohe, me whakapā atu koe ki te apiha pōti o tō kaunihera.
I runga i tō noho i te rārangi matatapu, kāore e aunoa te tuku atu i ō pepa pōti ki a koe mā te poutāpeta.
Te tono kia uru ki te rārangi matatapu