How to vote from overseas

Me rēhita rawa, e taea ai tō pōti. Mēnā kua rēhita kē koe, whakaūngia te tika o ō taipitopito.

Kāore e āhei tō rēhita, tō whakahou rānei i ō taipitopito mō te Pōtitanga Whānui 2026 i muri i te weherua pō o te 25 o Oketopa.

He māmā te rēhita, te whakahou rānei i ō taipitopito i te ipurangi mā te whakamahi i tō raihana hautū waka o Aotearoa, i tō uruwhenua o Aotearoa, i tō tuakiri RealMe rānei kua manatokohia.

Te rēhita, te whakahou rānei i ō taipitopito mā te ipurangi

E pōti ai koe i tāwāhi i tētahi pōtitanga o Aotearoa, me rēhita koe i mua i te weherua pō (e ai ki te wā i Aotearoa), 13 ngā rā i mua i te Rangi Pōtitanga.

Mēnā he mema koe nō Te Ope Kātua o Aotearoa kua whakatūria ki tāwāhi, kāore koe e herea kia rēhita ki te pōti - engari ki te kore koe e rēhita, kāore e whakaaetia tō tikiake i ō pepa pōti.

Kāore e tukuna aunoatia ō pepa pōti ki a koe i tāwāhi.

Ko te huarahi e māmā katoa ana, e tere katoa ana hoki ki te pōti i tāwāhi, ko te tikiake i ō pepa pōti. I mua i tō tikiake i ō pepa pōti, me tika tō rēhitatanga.

Mēnā kei te rārangi matatapu koe, kāore e āhei tō tikiake i ō pepa pōti. Tēnā, whakapā mai ki overseas@vote.nz e whai āwhina atu anō ai.

Tērā pea, ka āhei hoki tō pōti ki tētahi wāhi pōti i tāwāhi.

Ka kitea tētahi rārangi wāhi pōti i tāwāhi i tēnei paetukutuku i mua i te pōtitanga.

https://vote.nz/2026-general-election/overseas/find-an-overseas-voting-place

Tohua matihikotia ō pepa pōti, tāia rānei, ka whakaotihia, ka matawaihia ai

Kua āhei ngā kaipōti mai i tāwāhi ki te tohu matihiko i ā rātou pepa pōti, ā, kua āhei ngā kaipōti mai i tāwāhi, me ō rātou kaitaunaki, ki te whaitohu i te tauākī pōti motuhake mā tētahi pūrere matihiko, mā te whakauru rānei i tētahi whaitohu matihiko, mēnā e whakaatu tika ana i tō rātou whaitohu māori.

Ka āhei hoki tō tā i ō pepa pōti me te whakaoti ā-ringa, kātahi ka matawaitia, ka whakaahuatia rānei, ka tukuatu ai.

E rua ō pōti — he pōti ā-rōpū, he pōti ā-rohe hoki.

Ko tō pōti ā-rōpū me tuku ki te rōpū tōrangapū e tautoko nei koe.

Ko tō pōti ā-rohe hei kōwhiri i te kaitono e hiahia ana koe kia tū hei mema Pāremata (MP) mō te rohe pōti e noho nā koe.

Ka āhei tō pōti ki tētahi rōpū me tētahi kaitono, ki tētahi rānei o ērā, kaua ki tērā atu — kei a koe te tikanga. 

Te pōti ā-rōpū

Ki te taha mauī o tō puka pōti, meatia he tohu tika ki te porowhita i te taha o te ingoa o te rōpū tōrangapū ka kōwhiringia e koe.

Me pōti koe ki tētahi rōpū tōrangapū kotahi. 

Te pōti ā-rohe

Ki te taha matau o tō puka pōti, meatia he tohu tika ki te porowhita i te taha o te ingoa o te kaitono ka kōwhiringia e koe.

Me pōti koe ki tētahi kaitono kotahi. 

Kia tohua ō pepa pōti, whakahokia mai ki a mātou mā tētahi o ēnei huarahi:

• Te tukuatu mā te ipurangi
• Te tuku mā te poutāpeta, mā te ringa rānei ki tō wāhi pōti i tāwāhi e pātata katoa ana ki a koe.

Tēnā whakapā mai ki overseas@vote.nz mēnā kāore e taea e koe tēnei mahi.

Kāore e āhei tō whakahoki i ō pepa pōti mā te īmēra, mā te waea whakaahua rānei.

Mēnā e tukuatu ana koe i ō pepa pōti, me whakahoki mai i mua i te 7pm (e ai ki te wā i Aotearoa) i te rangi pōtitanga.

Kei ō pepa pōti ngā kōrero katoa mō te huarahi e whakahokia mai ai ngā pepa.