Can't get to a voting place?

E āhei ana tō whakamana i tētahi atu kia tiki i ō pepa pōti i te wāhi pōti mōu.

He whārangi i tēnei whārangi hei tikiake māu, ka waitohu ai, me te hoatu ki tētahi hei hari atu māna ki tētahi wāhi pōti.

Mēnā kāore e āhei tō tikiake me te tā i taua puka, e pai tonu ana tō tuhi ā-ringa i ngā mōhiohio nei ki tētahi pepa, tō tiki rānei i te puka i te wāhi pōti e pātata katoa ana ki a koe.

Me mātua tuhi ēnei kōrero ki tō tuhinga whakaaetanga:

• Tō ingoa tuatahi me tō ingoa whānau
• Tō tauwaea
• Tō wāhi noho, i reira rā koe rēhitatia ai hei kaipōti
• Te rārangi kaipōti (te rārangi whānui, te rārangi Māori rānei), ki tō mōhio, i rēhitatia rā koe
• He tauākī e mea ana e whakaae ana koe mā te tangata kei a ia te tauākī ō puka pōti e kohi mōu

Mā taua tangata tonu ō puka pōti e kawe ki a koe hei whakaoti māu. E kapi ana i tēnei ko tētahi whakapuakanga pōti motuhake, me whai kaitaunaki te waitohutanga. 

Me mātua whakahoki ō puka pōti ki tētahi wāhi pōti i mua i te katinga o te wā pōti, i te rangi pōtitanga.

Tē āhei te tae atu ki tētahi wāhi pōti?

Mēnā kāore e āhei tō tae atu ki tētahi wāhi pōti, ā, kāore hoki he tangata hei kohi i ō puka pōti mōu, tēnā whakapā atu ki tō kaiwhakahaere pōti ā-rohe. Kia tata ake ki te tīmatanga o te wā pōti māna koe e whakapā ki te kōrero i ngā whakaritenga mōu.

Ka taea pea te kawe atu i ngā pepa pōti ki a koe, ka tiki atu ai.

Whakapā atu ki tō kaiwhakahaere pōti ā-rohe

Ko te ara māmā katoa ki te pōti i tāwāhi ko te tikiake i ō puka pōti, ka whakaotihia ai me te tukuatu.

Ka pai hoki pea tō tae ā-tinana ki te pōti ki tētahi wāhi pōti i tāwāhi.

Te pōti mai i tāwāhi

Mēnā kei tētahi rohe mamao koe i te wā o te pōti – arā, kei tētahi moutere i mamao i Aotearoa e whakahaeretia ana e Te Papa Atawhai; kei te au o te moana rānei tō kāinga; kei tētahi kaipuke rānei koe e mahi ana i te wā o te pōti - ka āhei pea tō pōti mā ā mātou ratonga mō te pōti mai i mamao.

Te pōti mai i mamao

Mēnā kei tētahi kāinga tautiaki, kei tētahi kāinga kaumātua rānei koe, ā, kāore e āhei tō tae atu ki tētahi wāhi pōti, kāore he take o tō whakapā mai ki a mātou. Mā te Kaiwhakahaere Rohe Pōti o tō rohe e whakapā atu ki te kaiwhakahaere i tō kāinga tautiaki hei whakarite i ngā ratonga pōti. Kōrero atu ki ngā kaimahi i tō kāinga tautiaki ki te kimi mōhiotanga ki ā rātou whakaritenga kia āhei ai te pōti a ngā kainoho.

Mēnā kāore e āhei tō tae atu ki tētahi wāhi pōti nā te mea kei te hōhipera koe, ka taea e tētahi hoa, e tētahi whanaunga rānei te kawe atu ō pepa pōti ki a koe.

Mēnā kua whakaritea kia kuhu koe ki te hōhipera i mua i te rangi pōtitanga, ko te painga ake kia tōmua tō pōti, mēnā ka taea.

Waea mai ki 0800 36 76 56 mō ētahi pārongo atu anō. 

Mēnā e kāpō ana, e āhua kāpō ana, he hauātanga rānei tōu e kore ai e taea e koe te whaitohu tō puka pōti i te korenga o tētahi kaiāwhina, ka āhei tō pōti mā te whakamahi i te ratonga kōrero ā-waha mā te waea.

Me mātua rēhita, e taea ai tō whakamahi i tēnei ratonga, ahakoa kua whakamahia kētia pea e koe i ngā pōtitanga i mua i tēnei. 

Ka tuwhera te wā rēhita mō te ratonga kōrero ā-waha mā te waea hei te Mane, te 5 o Oketopa 2026, ā, ka kati hei te poupoutanga o te rā (i Aotearoa) i te rangi pōtitanga, hei te Hatarei, te 7 o Noema 2026.

Ka tuwhera te wā pōti mā te ratonga kōrero ā-waha mā te waea hei te Wenerei, te 21 o Oketopa 2026. Ka kati hei te 7pm (i Aotearoa) i te rangi pōtitanga, hei te Hatarei, te 7 o Noema 2026.

Te ratonga kōrero ā-waha mā te waea

E whakaaetia ana e te ture kia whakawāteahia koe i te mahi kia haere ki te pōti. E āhei ana hoki tō pōti tōmua ki tētahi wāhi pōti tōmua.

Mēnā kāore anō koe kia whai i te wā e tika ana e taea ai te pōti i mua i tō tīmata ki te mahi i te rangi pōtitanga, ā, ehara i te mea he mahi waiwai, he ratonga waiwai rānei tāu e mahi nei, me tuku koe e tō kaiwhakawhiwhi mahi kia wehe i te mahi ki te pōti i mua i te 3pm. E whakaaetia ana e te ture kia tamō koe i te mahi mō te toenga o taua rā mēnā me pērā e taea ai tō pōti. 

Kāore e āhei te tango moni a tō kaiwhakawhiwhi mahi i tō utu mō te wā ka tamō koe kia tae atu ai ki te pōti. 

Mēnā he mahi waiwai, he ratonga waiwai rānei tō mahi

Mēnā me mahi koe ā muri atu i te 3pm e tutuki ai tētahi mahi waiwai, tētahi ratonga waiwai rānei, me tuku koe e tō kaiwhakawhiwhi mahi kia wehe i te mahi mō te wā e tika ana i mua i te 3pm, e taea ai tō pōti. 

Kāore e āhei te tango moni a tō kaiwhakawhiwhi mahi i tō utu mō te wā ka tamō koe kia tae atu ki te pōti, ki te kore e roa ake i te 2 hāora tō tamōtanga. 

He kaimahi koe ki tētahi kaipuke

Mēnā koe e mahi ana ki tētahi kaipuke kua tau ki te wāpu, ā, kua rēhita koe ki te wāhi pōti kei reira rā te kaipuke, me tuku koe e tō māhita kaipuke kia haere ki uta ki te pōti. 

Mēnā koe e mahi ana ki tētahi kaipuke kāore e tau ki te wāpu i te wā o te pōtitanga, whakapā mai ki a mātou ka tata ake ana ki te wā pōtitanga, e whai āwhina ai koe ki te rēhita me te pōti. 

Whakapā mai

Mēnā kua mauheretia koe, e whanga ana rānei kia whakawāngia, ā, e āhei ana tō pōti, ka mahi tahi mātou ki ngā kaimahi nō te Ara Pounamu Aotearoa kia whai ratonga pōti ai koe.

Te pōti mai i te whare herehere

E āhei ana tō pōti mēnā ka poto ake i te 3 tau te roa o tō mauheretanga, ka mutu, ko ngā hara katoa e mauheretia nei koe nō mua i te rā 20 o Tīhema, 2025. 

Mēnā e mauheretia ana koe i a koe e whanga ana kia whakawāngia

E āhei ana tō pōti mēnā e mauheretia ana koe i a koe e whanga ana kia whakawāngia. Mā mātou e whakarite ratonga e taea ai tō pōti. 

E āhei ana tō pōti mēnā kua mauheretia koe ki te kāinga, e whakatutuki haere ana rānei koe i tētahi whiunga e takea mai i te hapori. Mā ngā āpiha pōtitanga e tuku atu ki ngā ratonga matakana (Probation Services) e pātata ana ki a koe mō ngā ara pōti e wātea ana ki a koe. 

Mēnā kei te whare pirihimana koe e mauheretia ana i tō rohe pōti i te rangi pōtitanga, ka tae atu tētahi ohu pōti ki a koe i mua i te poupoutanga o te rā e taea ai tō pōti.