- English
- Māori (active language)
Ko ngā āhuatanga ki te wāhi pōti
Anei ngā āhuatanga i tōna tikanga ka kitea e koe ka toro ana ki tētahi wāhi pōti i te wā o te pōtitanga whānui, o te pōtitanga whakakapi rānei mō te pāremata.
Ka tae ana koe ki tētahi wāhi pōti, mā ā mātou kaimahi koe e manaaki, me te whakautu hoki i ō pātai. Ka mau koti karaka ā mātou kaimahi.
He tohu hoki ka whakairihia hei ārahi i a koe ki te wāhi e tika ana.
Mēnā he kāri PōtiMārire tāu, mauria atu, ā, me pōti ki tētahi wāhi e tata ana ki tō kāinga. Mā reira e tere ake ai te pōti.
Mēnā ka rēhita koe i mua i te Rangi Tauātuhi, i tōna kotahi marama i mua i te rangi pōtitanga, ka kitea tō ingoa ki te tānga o te rārangi i ngā wāhi pōti o tō rohe, ā, mā reira e māmā ake ai te tuku i ō pepa pōti.
Mō te Pōtitanga Whānui 2026, hei te Hanarei, te 4 o Oketopa te Rangi Tauātuhi
Mēnā ka rēhita koe i muri i te Rangi Tauātuhi, engari i mua i te rā kati mō ngā rēhita (i mua i te weherua pō, 13 ngā rā i mua i te Rangi Pōtitanga), ka pōti koe mā te pōti motuhake.
Kāore koe e āhei ki te rēhita ki te pōti, ki te whakahou rānei i ō taipitopito rēhitatanga mō te Pōtitanga Whānui 2026 i muri i te weheruatanga o te pō, te Hanarei 25 o Oketopa.
Te āhua o te pōti i te pōtitanga whānui
Te whakaahua me te kapo kiriata
He mahi whaiaro te pōti, nō reira e tono ana mātou kia manaaki koe i te tūmataititanga o ētahi atu kaipōti.
Tēnā, kaua e kapo kiriata, e whakaahua rānei i roto i tētahi wāhi pōti.
He takahi ture pea te whakaputa i te whakaahua, i te kiriata rānei o te tangata e whakakī ana i tana puka pōti, ā, kāore e whakaaetia i te wāhi pōti.
Mēnā he take e hiahia ana koe kia kapo kiriata, kia whakaahua rānei i tētahi wāhi pōti, pērā i te whakaahua i tētahi kaitono e pōti ana, me mātua tuku mai i tētahi tono ki returns@elections.govt.nz
Te noho tonu ki tētahi wāhi pōti
Ka mutu ana tō pōti, tēnā, kia kaua e roa tō noho mai, me tika tonu atu tō wehe atu i te wāhi pōti.
Mā konei e tiakina ai te tūmataititanga o te tukanga pōti, e noho hāneanea ai hoki ētahi atu kaipōti i a rātou e pōti ana.
Ngā pae pāhopori
I te wā o te pōtitanga, he ture mō ngā mahi e whakaaetia ana, mō ngā mahi hoki kāore e whakaaetia ana i ngā pae pāhopori.
Atu i te weheruatanga o te pō i mua i te rangi pōtitanga, tae noa ki te 7pm o te rangi pōtitanga, kāore e whakaaetia tō tuku, tō tohatoha rānei i ngā kōrero e whakaawe ana pea, e whai ana rānei ki te whakaawe i te pōti ā-rohe, i te pōti ā-rōpū rānei a tētahi.
I te rangi pōtitanga, kāore e whakaaetia te whakatairanga pōtitanga kua utua kia whakaatahia mā runga ipurangi.
Ka kapi tonu i ngā ture mō te rangi pōtitanga ko te whakaputanga o ngā whakaaro whaiaro ki te tōrangapū mā runga ipurangi.
Ko ā mātou kaimahi
Nō tō hapori tonu rā pea ngā kaimahi o Te Kaitiaki Take Kōwhiri i tō wāhi pōti. E hiahia ana rātou ki te āwhina i a koe ki te whakatinana i tō mōtika manapori ki te pōti.
Tokomaha ā mātou kaimahi ko tēnei te wā tuatahi kua mahi i te pōtitanga, ā, he nui ngā mea hei maumaharatanga, hei mahi mā rātou!
Mēnā he whakatōmuritanga, tēnā, kia manawanui, i ā mātou kaimahi e whai ana i ngā mahi e tika ana hei hāpai i tā tātou tukanga pōti.
Mō mātou
Ko tā Te Kaitiaki Take Kōwhiri he whakahaere i ngā pōtitanga pāremata. E whai ana mātou kia hāpai i tētahi pūnaha pōti e whai hua ana, e tōkeke ana hoki, ka mārama, ka pono hoki ki a ngāi Aotearoa.
Kei ngā tāngata katoa o Aotearoa te mōtika kia pōti kau noa. Ka tiaki mātou i te matatapu o tō pōti i a koe e pōti ana, i a mātou hoki e tatau ana i ngā pōti.
Tēnā, kia whakautea e koe tā mātou whakahaere i ngā wāhi pōti. Mā ā mātou tukanga e pai ai ngā wheako o te tangata, e tiakina ai hoki tana tūmataititanga me ētahi atu mōtika.
Hei huarahi whakamutunga, ka panaia atu i te wāhi pōti ko ngā tāngata e whakatumatuma ana, e whakatutū ana rānei i te puehu. He takahi ture te korenga o te whai i ēnei tohutohu, ā, ka tukuna atu pea ki ngā pirihimana hei aro mā rātou.