- English
- Māori (active language)
Te whakatika raru mō tō rēhitatanga
E uaua ana rānei tō rēhita, tō tirotiro rānei, tō whakahou rānei i tō rēhitanga? Anei ētahi tuwhiri ka āwhina pea i a koe.
Tirohia ō taipitopito mā te ipurangi
E āhei ana tō whakamahi i tā mātou taputapu ipurangi ki te tirotiro mēnā rānei kua rēhita koe.
Tīmatahia tō rapu
Me tuku mai tō ingoa, te rā i whānau mai ai koe, me tō wāhitau. Me rite pū ngā taipitopito e whakauru nā koe ki ngā taipitopito e puritia ana e mātou, ki te kore, kāore pea e kitea tō rēhitatanga.
E kaha ana ngā here o tā mātou pūrapu hei tiaki i tō matatapu.
Kia mataara i te whakakī aunoa/whakaoti aunoa
Hei āwhina, kua tiakina pea e tō pūtirotiro ngā taipitopito mō tō wāhitau, ka mutu, ka tono kia whakaurua mōu ka whakamahi ana koe i tā mātou pūrapu.
Ko te mate kē, he nui ngā wā ka paku rerekē tō wāhitau e puritia ana i tō wāhitau rēhita – ka hē rānei tā tō pūtirotiro whakauru aunoa i ō pārongo. Ki te pēnei, kāore e taea e tā mātou pūrapu te kite tō rēhitatanga.
Tērā pea ka whakakī aunoa tō pūtirotiro i te katoa o tō wāhitau ki te āpure o te tiriti, ko tō tāone rānei ki te āpure o te paenoho ki tō tāone (ka tāruaruatia hoki pea).
Ko tā mātou tūtohunga kia katia te kōwhiringa o te whakakī aunoa (ka kīia pea ko te “Saved info” i ētahi pūtirotiro) me te pato ā-ringa i ō taipitopito. Mā te pērā e taea ai tō whakamahi i te āheinga o te tirotiro i te wāhitau kei roto i tā mātou puka rapu.
Kāore i te kitea tō rēhitatanga?
Ki te kore koe e kite i a koe anō i te pūrapu, ehara pea i te mea kāore anō koe kia rēhitatia! Ko ētahi anō take pea, ko ēnei:
- Ko te korenga o ngā taipitopito i tuku mai rā koe e ōrite pū ki ērā kei a mātou.
Mēnā he paku rerekētanga i waenga i ngā pārongo e puritia ana e mātou me tāu i whakauru ai, kāore pea te pūrapu e kite i a koe. Ka pēnei pea i ōna wā i runga i ngā raru o te whakakī aunoa, engari tērā anō pea ko te tātaki kupu rānei, ko te takoto rānei te take. - Nō nā tata nei koe rēhita ai.
Mēnā nō nā tata nei koe rēhita ai, whakahou ai rānei i ō taipitopito, kāore e kitea ō taipitopito hou i te ipurangi i taua wā tonu. Me whai wā mātou ki te āta tirotiro me te whakaoti i te tukanga o ngā rēhita. Ka whakapā atu mātou ki a koe ka tutuki ana te tukanga whakauru i tō rēhitatanga. - Kei te rārangi hōngoingoi koe.
Mēnā kua neke whare koe mai i te wā whakamutunga i whakahou ai koe i tō rēhitatanga, kua tukua pea koe ki te rārangi hōngoingoi. Me whakahou rawa koe i tō wāhitau kei a mātou, e kite ai koe i a koe anō ki te pūrapu. - Kei te noho koe ki te rārangi matatapu.
Mēnā kua kōwhiri koe kia noho ki te rārangi matatapu, kāore e taea tō rapu i ō taipitopito. Whakapā mai ki tō mātou tīma mō te rārangi matatapu ki unpublished.roll@elections.govt.nz
Ki te anipā koe, whakapā mai
Ki te kore koe e kite i tō rēhitatanga, mēnā rānei e māharahara ana koe ki ō taipitopito rēhita, tēnā, whakapā mai kia tirohia ai e tō mātou tīma rēhita.
Te tiaki i te tika o ō taipitopito rēhita
Ehara i te mea kotahi anake tō rēhitatanga – me tiaki te tika o ō taipitopito rēhita hei whakaū i tō rite ki te pōti.
He aha mātou e hiahia nei ki tō wāhitau o nāianei?
Mā te wāhitau i tō rēhitatanga e whakatau te rohe pōti e pōti ai koe i ngā pōtitanga pāremata.
Mā tō wāhitau hoki e whakatau ki tēhea o ngā pōtitanga ā-kaunihera koe e pōti ai i ngā pōtitanga ā-rohe, ki tēhea wāri hoki koe pōti ai ki ngā kaikaunihera.
Ki te hūnuku koe ki whare kē, he mea nui kia whakahou koe i tō wāhitau. Kāore e aunoa te pērā. Me tika tō wāhitau kei a mātou, e taea ai tā mātou tuku pārongo ki a koe mō ngā pōtitanga. Mā reira hoki e taea ai tā tō kaunihera ā-rohe tuku i ō pepa pōti mō ngā pōtitanga ā-rohe ki a koe.
Ki te kore e tiakina kia tika ngā taipitopito mō tō wāhitau, ka tangohia pea koe i te rārangi kaipōti ā tōna wā. Ki te pērā, ka pātuhi atu pea, ka īmēra atu rānei mātou ki a koe kia whakahoungia e koe ō taipitopito.