He aha te pānga o tō kōwhiringa ki a koutou ko tō whānau?
Ko tā tō kowhiringa rārangi kaipōti he whakaū i ngā kaitono hei kōwhiringa māu ki ngā pōtitanga ā-pāremata me ngā pōtitanga ā-rohe. Ka whai pānga hoki ki te whakatau i te nui o ngā rohe pōti Māori me ngā rohe pōti whānui.
Te pōti i ngā pōtitanga ā-pāremata me ngā pōtitanga whakakapi
Ko tā tō kowhiringa rārangi kaipōti he whakaū i te rohe pōti e mana ai tō pōti, me ngā kaitono hei kōwhiringa pōti māu hei māngai mōu ki te Pāremata.
- Mēnā koe ka kōwhiri i te rārangi pōti Māori, ka pōti koe ki tētahi kaitono e whai ana i te tūru rohe pōti Māori.
- Mēnā koe ka kōwhiri i te rārangi pōti whānui, ka pōti koe ki tētahi kaitono i te tūru o te rohe pōti whānui e noho nei koe.
- Kotahi tonu te rārangi rōpū tōrangapū hei kōwhiringa māu i te pōtitanga whānui, ahakoa te rārangi ka kōwhiringia e koe.
Hei tauira, mēnā kei Rotorua koe e noho ana, ā, ka kōwhiri koe i te rārangi Māori, ka pōti koe ki te rohe pōti o Waiariki.
Ko te tangata mōna te kaute pōti nui katoa i te rohe pōti Māori o Waiariki, koia ka tū hei MP mō tō rohe.
Mēnā koe ka kōwhiri i te rārangi pōti whānui, ka pōti kē koe ki te rohe pōti o Rotorua. Ko te tangata mōna te tapeke pōti nui katoa i te rohe pōti Māori o Waiariki, koia ka tohua hei MP ā-rohe mōu.
Mēnā he whakapapa Māori ōu, ā, koinei tō rēhitatanga tuatahi, e āhei tonu ana tō kōwhiri i te rārangi Māori, i te rārangi whānui rānei.
Rapua tō rohe pōti ki te mahere
| Ko te rārangi Māori rānei, ko te rārangi whānui rānei? Kei a koe te tikanga. | Ahakoa te rārangi kaipōti e noho nei koe, kotahi tonu te rārangi rōpū tōrangapū hei kōwhiringa māu. | He aha te pānga o tō kōwhiringa rārangi kaipōti? |
Te whakatau i te nui o ngā rohe pōti Māori me ngā rohe pōti whānui
E whakamahia ana ko te nui o ngāi Māori i te rārangi whānui me te rārangi Māori, me ngā kitenga o te tatauranga ā-motu anō hoki, hei whakatau i te nui o ngā rohe pōti whānui, me ngā rohe pōti Māori.
Ka whai pānga te nui o ngāi Māori i te rārangi Māori ki te piki, ki te heke, ki te ū tonu rānei o te nui o ngā rohe pōti Māori mō ngā pōtitanga kei te heke mai.
I tēnei wā, e whitu ngā rohe pōti Māori, ā, e 64 ngā rohe pōti whānui.
I te 1 o Āperira 2024, i whakamōhio atu te Kaitiaki Take Kōwhiri i a Tatauranga Aotearoa ki te nui o ngāi Māori i te rārangi Māori, me te rārangi whānui.
Kua tātaihia e Tatauranga Aotearoa te nui o ngā rohe pōti mō te Pōtitanga Whānui 2026:
- kua heke te nui o ngā rohe pōti whānui o te Ika a Māui i te 49 ki te 48
- 16 tonu ngā rohe pōti whānui o te Waipounamu
- e 7 tonu ngā rohe pōti Māori.
Mā hea whakatauhia ai ngā roherohenga pōti?
Te tātai i te nui o ngā rohe pōti e tika ana
Te Arotakenga Roherohenga 2025
Te pōti i ngā pōtitanga ā-rohe
He pānga hoki pea ō tō kōwhiringa rārangi ki ō kōwhiringa pōti i ngā pōtitanga ā-rohe. Mēnā koe ka kōwhiri i te rārangi Māori, ā, he wāri Māori, he takiwā pōti Māori rānei tō tō kaunihera ā-rohe, ka pōti koe ki ngā kaitono e whai ana i taua tūru wāri Māori, i taua takiwā pōti Māori rānei. Mēnā koe ka kōwhiri i te rārangi whānui, ka pōti koe ki ngā kaitono e whai ana i tētahi tūru i te wāri whānui, i te takiwā pōti whānui rānei.
Te whai wāhi atu ki te rārangi matatapu
Mēnā koe e māharahara ana ki tō haumarutanga, ki te haumarutanga rānei o tō whānau, e āhei ana tō tono kia whai wāhi atu ki te rārangi matatapu.
Mā te uru ki te rārangi matatapu, kāore ō taipitopito e whai wāhi atu ki ngā tānga o ngā rārangi kaipōti. Kāore hoki e taea tō tirotiro, tō whakahou rānei i ō taipitopito mā te ipurangi. Ka pōti koe mā te pōti motuhake i ngā pōtitanga ā-pāremata, ā-rohe hoki.
Kāore e pāngia te rohe pōti, te wāri kaunihera, te takiwā pōti rānei e noho nei koe, kāore hoki e pāngia tō noho i te rārangi whānui, i te rārangi Māori rānei.