The content on this page can be viewed in the following languages
Ka tū ngā pōtitanga ā-rohe i te tau 2025 kia pōtihia ai he mema mō ngā kaunihera ā-tāone, ā-rohe, ā-takiwā hoki. Mā ia kaunihera ōna nō pōtitanga e whakahaere.
He tirohanga whānui
Hei te 9 o Hepetema 2025
Ki te 11 o Oketopa 2025
Whakaputaina ō whakaaro mō ngā māngai mō tō hapori mā te pōti i ngā pōtitanga ā-rohe o 2025.
I roto i ngā pōtitanga ā-rohe, ka kōwhiria ō tātau māngai i roto i ngā kaunihera ā-tāone, ā-rohe, ā-takiwā hoki.
Mā te hunga kua pōtihia ki roto i ngā kaunihera e whakatau ētehi o ngā āhuatanga e ora nei tātau me te anamata o ngā tāone. Mā rātau ngā reiti e whakatau, e kohikohi, ā, mā rātau e whakatau tikanga mahere mō ngā tāone. Mā rātau hoki e tuku ratonga pērā i ngā tangohanga rāpihi, i ngā pāka, me ngā whare pukapuka.
I ētehi wāhi o Aotearoa, he pōtitanga ā-rohe nō mō ngā poari ā-rohe me ngā poari hapori, ngā taratī raihana, me ētehi atu umanga.
Ko ngā pōtitanga rohe pōti Māori
I roto i ngā pōtitanga ā-rohe o 2025, ka whakahaerehia he pōtitanga nō e ētehi o ngā kaunihera kei reira rā he takiwā pōti Māori, kia uia ai ngā kaipōti mehemea e pīrangi ana ki te pupuru i aua rohe pōti Māori.
About Māori wards and constituencies (votelocal.co.nz)
Rēhita mai kia puta ai ō whakaaro
Mehemea kua rēhita koe ki te rārangi pōti, ka āhei koe ki te pōti i ngā pōtitanga ā-rohe o te wāhi e noho nā koe.
Ka āhei koe ki te rēhita mehemea kua 18 tau tō pāhake, kua pāhake ake rānei koe, ā, he kirirarau koe nō Aotearoa, he kainoho pūmau rānei koe nō Aotearoa, ā, kua noho koe ki Aotearoa mō tētehi wā roa ake i te 12 marama karapipiti, i roto i ngā tau.
Ka āhei koe ki te rēhita ā-ipurangi, ki te whakahou ā-ipurangi rānei i ngā taipitopito mōu. Ka āhei rānei ki te waea mai ki 0800 36 76 56 ki te tono āwhina.
Rēhitatia, whakahoungia ā-ipurangi rānei
Mehemea ka rēhita mai koe ā muri i te Paraire te 1 o Ākuhata
Ki te rēhita koe, ki te whakamōhio mai rānei ki tō wāhi noho hou ā muri i te 1 o Ākuhata 2025, kāhore e tukua atu ō puka pōhi ki a koe i te mēra. Māu e toro atu ki te āpiha pōti o tō kaunihera.
Ko te rā whakamutunga o ngā pōtitanga ā-rohe ko te Paraire te 10 o Oketopa 2025.
Electoral officers (votelocal.co.nz)
Ko te rārangi pōti Māori, ko te rārangi pōti whānui rānei?
Mehemea he uri Māori koe nō Aotearoa, ka āhei koe ki te kōwhiri i te rārangi pōti Māori, i te rārangi pōti whānui rānei. Ka pā atu peangē tō kōwhiringa rārangi ki ngā kōwhiringa kaitono e hora ana ki a koe i roto i ngā pōtitanga ā-rohe.
Mehemea kua rēhita koe, ā, kua hiahia ki te whakawhiti rārangi i mua i ngā pōtitanga ā-rohe, me whakawhiti i mua i te Tāite te 10 o Hūrae 2025.